بقلم محمد الدكروري
كلمتين لكل شاب أو فتاة مقبلين على الزواج.. لازم تعرفوا إن حضرة النبي صلى الله عليه وسلم وضع لنا معايير لإختيار الزوج الصالح للفتاه .. كما وضع لنا معايير لإختيار الزوجة الصالحة للشاب..
فلازم نخلي بالنا كويس من المعايير دي قبل ما ندخل ونتورط في مشاكل كبيرة نندم أشد الندم عليها بعد كده .. ونخسر خسارة كبيرة من تحت خطأ عدم الإختيار الصحيح والمناسب والمطابق للمعايير إللي وضعها لنا حضرة النبي صلى الله عليه وسلم..
والمعايير دي هي الأخلاق والدين للطرفين حيث قال النبي صلى الله عليه وسلم ( إذا جاءكم من ترضون دينه وخلقه فزوجوه ) فهنا على كل أب أن يختار لبنته الشاب المتدين الملتزم الذي يراعي الله عزّ وجل في كل أمورة وأكيد هيصون بنته وهيكرمها وهيعاملها معامله حسنه ترضي الله ورسوله.
وكذلك الشاب لازم يختار الفتاه المتدينه ذات الدين إللي تعرف ربنا كويس ويبان ده في لبسها ومشيها وكلامها وأسلوبها في المعاملات الاجتماعية بين الناس ومع أهلها ويأكد كويس على جملة ذات الدين.
ونخلي بالنا كويس يا شباب علشان ظهرت ظاهرة غريبة أوي اليومين دول وهي إن في بعض الناس أصبحت تتاجر بزواج بناتها
يعني البنت تتزوج الشاب وبعد شهرين تلاته تفتعل مشكلة بينها وبين جوزها علي أتفه الأسباب وتتركه وتروح تقعد في بيت أبوها.
ومن هنا تبدأ المساومة بين أبوها وجوزها وتنتهي في الآخر بالطلاق بعد ما تكون البنت أخدت منه قرشين حلوين وشوية عزال كويسين وتروح تدور علي صيدة تانية يعني عريس تاني وهكذا ماشية الشغلانه بهذة الطريقة بين بعض الناس.
فلازم على كل شاب قبل ما يناسب يحاسب ويعرف هو داخل فين وداخل عند مين ويشوف الأول لما مراته هتغضب بعد كده لما يتجوزوا إن شاءالله هيكلم مين وهيحل أموره مع مين؟؟
هل هيحل مشكلته مع راجل ولا مع ست؟؟ وهل هيحل مع راجل يعرف ربنا وملتزم ؟؟ ولا مع راجل عايش في غيبوبة ومش عارف هو رايح فين أو جاي منين؟؟
وكتير أوي من الشباب إللي اتجوز وطلق تلاقيه يقولك الناس طلعت مش كويسة والناس طلعت بنت ستين في سبعين طيب أنت كان فين عقلك من الأول وكان فين مشورة النبي صلى الله عليه وسلم في الموضوع ؟ مش حضرة النبي صلى الله عليه وسلم قال ( فاظفر بذات الدين تربت يداك)
أنت ليه مروحتش لذات الدين وليه تركتها وروحت للي مهتمه بشكلها ولبسها وتسريحتها ومشيها وكلامها وجمالها وموضتها قبل ما تهتم بربها ورسولها ودينها يبقي أنت تستاهل كل إللي يجرالك فلازم نخلي بالنا كويس علشان الدنيا صعبة جداً ومفيش حاجه بالساهل دلوقتى واللي هتخسره مش هتعرف تعوضه..
يبقي وجب علينا نقول...
قبل ما تناسب حاسب...
الكاتب محمد الدكروري ...