كلمات / الشاعر مكاريوس رضا
بتعب قووووي وبتأثر
من اي كلام يتقال
قلبي الحديد اتكسر
اتهز ع الارض ومال "
بخبط ع الفرحه بقلبي
تبعدني وتقولي يحنن
بقيت دالوقتي مستهدف
بعد اما كنت متأمن
العمر بيمر ويسبني
ويعدي عليا زي الطيف
كل اللي قال انه حاببني
أصبح كده زي الضيف "
نفسي اغمض لو ثواني
والاقي الامان ليا ضم
اتمني زمان يرجع تاني
ماحزنش لحظه ولااشيل هم
نفسي اكون طفل صغير
وابدأ من تاني طفولتي
واجيب دبدوبي وعروستي
وبيهم انا هعمل عيلتي
ابقي حاضر ف غيابي
واضحك ف وسط التنهيده
واشتاق لسنوحي وحابي
واسمع بكار ورشيده
واضحك ضحكه من جوه
زمان خلتني سخسخت
العب كهربا وشد الحبل
واخلص مصروفي فالبخت
وابني بيت علي الرمله
من غير ولا اي تعليم
وافك من مدرستي وامشي
في كل وقت تطعيم "
والاقي الفرح فينا راكن
والقلب حس بكل امان
ورغم ده كله لكن
اصبح الخير بس زمان "
لقيت العمر مفهوش خير
وشفت شكلي ف مرايا
لقيت نفسي تاني كبير
وماتت احلامي جوايا "
شكلي مفهوش وضوح
وملامحي اتملت تجاعيد
وكل الحاجات بتروح
لكنها بتروح لبعيد